അദ്ദിക്ർ

ഗ്രന്ഥത്തിന്‍റെ വിരോധങ്ങള്‍ അനുവദനീയമായി കൊണ്ടുനടക്കുന്നവര്‍ ഗ്രന്ഥം കൊണ്ട് വിശ്വസിച്ചിട്ടില്ല എന്ന് പ്രപഞ്ചനാഥന്‍ അവന്‍റെ പ്രവാചകനിലൂടെ പഠിപ്പിച്ചിട്ടുണ്ട്. അതുകൊണ്ടുതന്നെ ഗ്രന്ഥത്തിന്‍റെ ആശയമായ അദ്ദിക്ര്‍ സത്യപ്പെടുത്തി ജീവിക്കാത്തവര്‍ ഗ്രന്ഥം കൊണ്ട് വിശ്വസിച്ചിട്ടില്ല. ഗ്രന്ഥത്തില്‍ പറഞ്ഞ ചില പദങ്ങളുടെ ആശയം വി ശദീകരിച്ചിട്ടുണ്ടാവുക ചിലപ്പോള്‍ മുന്‍ ഗ്രന്ഥങ്ങളിലായിരിക്കും. 4: 136 ല്‍, ഓ വിശ്വാസികളായിട്ടുള്ളവരേ! നിങ്ങള്‍ അല്ലാഹുവിനെക്കൊണ്ടും അവന്‍റെ പ്രവാചകനെക്കൊണ്ടും വിശ്വസിക്കുക, അവന്‍റെ പ്രവാചകന് ഇറക്കപ്പെട്ട ഗ്രന്ഥത്തെക്കൊണ്ടും മുമ്പ് ഇറക്കപ്പെട്ട ഗ്രന്ഥങ്ങളെക്കൊണ്ടും വിശ്വസിക്കുക, ആരെങ്കിലും അല്ലാഹുവിനെക്കൊണ്ടും അവന്‍റെ മലക്കുകളെക്കൊണ്ടും അവന്‍റെ ഗ്രന്ഥങ്ങളെക്കൊണ്ടും അവന്‍റെ പ്രവാചകന്‍മാരെക്കൊണ്ടും അന്ത്യദിനത്തെക്കൊണ്ടും നിഷേധിക്കുന്നുവോ, അപ്പോള്‍ തീര്‍ച്ചയായും അവര്‍ സത്യത്തില്‍ നിന്ന് അതിവിദൂരം വഴിപിഴച്ചുപോയിരിക്കുന്നു എന്ന് പറഞ്ഞിട്ടുണ്ട്. ഈ സൂക്തത്തില്‍ ആദ്യം 'മുമ്പ് ഇറക്കപ്പെട്ട ഗ്രന്ഥം' എന്ന് ഏകവചനത്തിലും രണ്ടാമത് 'അവന്‍റെ ഗ്രന്ഥങ്ങളെക്കൊണ്ടും' എന്ന് ബഹുവചനത്തിലും പറഞ്ഞത് ഒറ്റഗ്രന്ഥം മാത്രമേ വന്നിട്ടുള്ളൂ എന്നും, അഥവാ ഗ്രന്ഥത്തിന്‍റെ ആത്മാവ് എക്കാലത്തും ഒന്നുതന്നെയായിരുന്നു എന്നും, എന്നാല്‍ അവയുടെ ശരീരം വ്യത്യസ്ഥമായിരുന്നു എന്നുമാണ്.

എല്ലാ ഓരോ കാര്യവും വിശദീകരിച്ചിട്ടുള്ള 56: 95; 69: 51 സൂക്തങ്ങളില്‍ പറഞ്ഞ ഉറപ്പ് നല്‍കുന്ന സത്യമായ അദ്ദിക്ര്‍ 25: 59 ല്‍ പറഞ്ഞ ത്രികാലജ്ഞാനിയിലൂടെ ഗ്രന്ഥമായി രൂപപ്പെട്ടിരിക്കെ അതിനെ സത്യപ്പെടുത്തി ജീവിക്കുന്നവര്‍ മാത്രമാണ് പരലാകം കൊണ്ട് ദൃഢബോധ്യമുള്ളവര്‍. അദ്ദിക്ര്‍ മനുഷ്യര്‍ക്ക് മൊത്തം ഉള്‍ക്കാഴ്ചാദായകവും ദൃ ഢബോധ്യമുള്ള ജനതക്ക് സന്മാര്‍ഗവും കാരുണ്യവുമാണെന്ന് 45: 20 ല്‍ പറഞ്ഞിട്ടുണ്ട്. എന്നാല്‍ ഇന്ന് അറബി ഖുര്‍ആന്‍ വായിക്കുന്ന ഫുജ്ജാറുകളും കുഫ്ഫാറുകളുമായ ഭ്രാന്തന്മാര്‍ സാക്ഷിയായ അദ്ദിക്റിനെ സത്യപ്പെടുത്താതെ ജീവിക്കുന്നത് കാരണം വിധിദിവസം: ഞങ്ങളുടെ നാഥാ! ഞങ്ങള്‍ നരകക്കുണ്ഠം കണ്ടു, അതിലെ രോദനങ്ങള്‍ കേള്‍ ക്കുകയും ചെയ്തു, അപ്പോള്‍ നീ ഞങ്ങളെ ഒന്ന് തിരിച്ചയച്ചാലും, ഞങ്ങള്‍ സല്‍കര്‍മ്മങ്ങള്‍ ചെയ്തുകൊള്ളാം, നിശ്ചയം ഞങ്ങള്‍ക്ക് ദൃഢബോധ്യം വന്നിരിക്കുന്നു എന്ന് പറയുമെന്ന് 32: 12 ല്‍ മുന്നറിയിപ്പ് നല്‍കിയിട്ടുണ്ട്. 69: 51 ല്‍ പറഞ്ഞ ഉറപ്പ് നല്‍കുന്ന സത്യമായ അദ്ദിക്ര്‍ ഉപയോഗപ്പെടുത്താതിരുന്നാല്‍ കണ്ണിന് ഉറപ്പാകുന്നത് വരെ ജ്വലിക്കുന്ന നരകം കാണുകതന്നെ ചെയ്യുമെന്ന് 102: 6-7 ല്‍ ഫുജ്ജാറുകള്‍ വായിച്ചിട്ടുണ്ട്. 32: 24 ല്‍, നമ്മുടെ സൂക്തങ്ങളില്‍ ദൃഢബോധ്യമുള്ളവരും പരലോകത്തിന് പ്രാധാന്യം കൊടുക്കുന്ന ക്ഷമാലുക്കളുമായിരുന്നപ്പോള്‍ ഇസ്റാഈല്‍ സന്തതികള്‍ക്ക് നാം അവരില്‍ നിന്നുതന്നെയുള്ള സന്മാര്‍ഗത്തിലേക്ക് നയിക്കുന്ന നേതാക്കളെ നിയോഗിച്ചിട്ടുണ്ടായിരുന്നു എന്ന് പറഞ്ഞിട്ടുണ്ട്. 27: 82 ല്‍, അവസാന നാളിന്‍റെ പ്രധാനപ്പെട്ട പത്ത് അടയാളങ്ങളില്‍ ഒന്നായ ഭൂമിയില്‍ നിന്ന് പുറപ്പെടുന്ന മൃഗം (ദാബ്ബത്തുല്‍ അര്‍ള്) വന്ന് 'നിശ്ചയം മനുഷ്യര്‍ നമ്മുടെ സൂക്തങ്ങള്‍ കൊണ്ട് ദൃഢബോധ്യമുള്ളവരല്ല' എന്ന് പറയുമെന്ന് പറഞ്ഞിട്ടുണ്ട്. അല്ലാഹുവിന്‍റെ സൂക്തങ്ങള്‍ കൊണ്ട് എന്ന് പറയുന്നതിന് പകരം 'നമ്മുടെ സൂക്തങ്ങള്‍ കൊണ്ട്' എന്ന് പറയുന്നത് മൃഗം അല്ലാഹുവിനുവേണ്ടി സംസാരിക്കുന്നതിനാലാണ്. പ്രവാചകന്മാരും അല്ലാഹുവിനുവേണ്ടി സംസാരിക്കുന്നവരായിരുന്നു. അതുപോലെ വിശ്വാസികളും അല്ലാഹുവിനുവേണ്ടി സംസാരിക്കുന്നവരായിരിക്കണം. 6: 158 ല്‍ വിവരിച്ച പ്രകാരം ഭൂമി തിരിച്ചുകറങ്ങി സൂര്യന്‍ പടിഞ്ഞാറുനിന്ന് ഉദിക്കുന്ന ഒരു വര്‍ഷത്തെ ദൈര്‍ഘ്യമുള്ള ദിനത്തിലാണ് ആ മൃഗം പുറപ്പെടുക എന്ന് പ്രപഞ്ചനാഥന്‍ അവന്‍റെ നിരക്ഷരനായ പ്രവാചകനിലൂടെ പഠിപ്പിച്ചിട്ടുണ്ട്. അല്ലാഹുവിനുവേണ്ടി സംസാരിക്കുന്ന ഒരാളും ഇല്ലാതാകുമ്പോഴാണ് മൃഗത്തെ അയച്ച് അല്ലാഹു ഇങ്ങനെ അവസാനത്തെ സാക്ഷ്യം നിര്‍വഹിക്കുന്നത്. 1: 3; 25: 33-34; 27: 1-3 വിശദീകരണം നോക്കുക.